Марко е помлад асистент на Институтот за математика при Природно-математички Факулет, а на Академијата за програмирање, програмер на неделата. Сигурни сме дека неговите студенти одлично го познаваат, па решивме и ние малку подобро да го запознаеме.

Апликациите за Академијата за програмирање се во тек. Види ја програмата тука.

Кажи ни колкава е примената на математиката во програмирањето и како ги поврзуваш овие две работи?

Математиката наоѓа примена во секоја сфера од животот 🙂 Логиката наследена од математиката е голем фактор при станувањето на добар програмер. Всушност, дел од програмските јазици се одлична алатка која се применува во математиката за побрза реализација на покомплексни математички задачи. Сите тие готови функции кои наоѓаат широка примена во математиката биле создадени од луѓе кои имале познавања од овие две тесно поврзани области. Математичарите можат да придонесат доволно во оваа област и да вметнат свои пристапи во истата. Голем број на програмерски компании во Македонија се обраќаат до нашиот факултет, барајќи студенти како нивен иден потенцијален кадар. На крајот, ниту тие знаат што треба да побараат од математичарите и како правилно да ги искористат нивните квалитети, ниту пак математичарите кои се почетници во таа област, не успеваат да се пронајдат во истата. Доколку студентите од математичките смерови, би оделе на пракса во програмерските компании во државава, верувам дека во иднина би биле едни од подобрите во оваа област.

Учењето е еден непрекинат процес. Како овојпат се снаоѓаш во улогата на ученик, наспрема досегашната улога како предавач на факулет?

Иако веќе 4 години се наоѓам од другата страна на катедрата, во ниту еден момент не сум престанал да бидам ученик, со оглед на дополнителните студии и курсевите кои сум ги посетувал во овој период. Од таа причина, ова не е воопшто ново за мене и мислам дека засега се снаоѓам добро 🙂 Истовремено можам да „фаќам“  прибелешки за начинот на кој предавачите ги држат вежбите и да направам споредба со моите методи, што навистина знае да биде забавно.

Хоби за дополнителна заработка или идна професија? Кој е твојот повик поради кој реши да станеш дел од оваа интензивна програма за програмирање?

Во изминативе 3-4 години дел од слободното време го минувам следејќи интерактивни онлајн курсеви од различни области на програмирањето. За време на студиите открив дека имам афинитети кон програмирањето, па решив да се обидам и во таа област. Со оглед на ограниченоста на онлајн курсевите и недоволното време поради секојдневните обврски, се јави потреба да запишам Aкадемија за front-end и back-end програмирање каде што ќе стекнам поголеми знаења. Изборот падна на Brainster. Засега, програмирањето ми е само хоби, иако во иднина планирам посериозно да се насочам во оваа област, особено во делот за back-end програмирањето. Преку работните предизвици кои ги добиваме за време на академијата се стекнуваме со добра основа за понатамошен развој во специфична област. Би излажал ако кажам дека не сум свесен дека работата во оваа област не е финансиски најпримамлива и нуди огромни можности за напредок како во ниту една друга професија, со тенденција уште повеќе да се развива во иднина. Со оглед на негативната насока во која се движи образованието во Македонија со мал простор за позитивни промени, програмирањето, од хоби за пополнување на слободното време, може да прерасне во моја примарна професија во иднина. Времето најдобро ќе покаже 🙂

Се зборува дека секој може да биде програмер. Што мислиш за ова и на што треба да обрне внимание секој кој во иднина сака да создаде кариера во програмирање?

Во последниве години, програмирањето дефинитивно е насока во која многу млади луѓе од државата ја гледаат својата иднина. Запишуваат факултети од оваа област, свесни за можностите кои ги нуди во иднина. Но, многу често сме сведоци дека огромен процент од нив воопшто не успеваат да го завршат факултетот и се откажуваат уште во првите години од студиите. Голем е бројот и на оние кои посетуваат академии како Академијата за програмирање во Brainster. Како и во секоја друга област, така и во програмирањето, за да успееш, треба да посветиш доволно време на учење и континуирано вежбање. Програмирањето нуди широк спектар на области во кои можеш да се надоградуваш и не е задолжително да бидеш добар во секоја од нив. Еден од предусловите да успееш во некоја област е навистина да сакаш да научиш. Ако го сакаш тоа што го работиш, не би требало да имаш проблеми да ги совладаш препреките. Исто е и во програмирањето.

 

Уписите се во тек ? http://codepreneurs.co/