Доколку ова е првиот твој обид за вработување, сигурно го чувствуваш притисокот кој со себе го носат CV-то и мотивациското писмо.

Да, твоето резиме е неверојатно важно, но подеднакво важно е мотивациското писмо. Особено знаејќи го фактот дека менаџерите кои вработуваат знаат дека некогаш подобар начин да процениш потенцијален кандидат за отворената позиција е по мотивациското писмо, кое дозволува повеќе слобода при нагласувањето на тоа – што те прави тебе совршен за позицијата.

Тажната вест е што пишувањето на добро писмо знае да биде комплицирана задача. Од една страна, секогаш се трудиме да не звучиме клише, но од друга внимаваме да не делуваме претенциозно и самобендисано, што не е толку лесен баланс за одржување. Како да се „продадеш” себеси, знаејќи дека би бил одличен на позицијата, а да не делуваш нарцисоидно?

Има неколку грешки кои почетниците скоро секогаш ги прават и кои некогаш ја ставаат на ризик нивната шанса за вработување. Одбери го полесниот и попријатен начин, и наместо да учиш од своите грешки (како што направивме ние), прочитај ја нашата листа најчести грешки и како да ги избегнеш.

Проблем бр. 1: Твоето писмо е предолго

blog 11 slika 2

Иако на училиште не учеа дека минимум должина на есеј е страна и половина, за мотивациско писмо тоа е премногу. Замисли дека работодавецот треба да прочита 10 такви во денот и обиди се да не користиш непотребни зборови и сите информации да ги сместиш во половина страна.

Совршената должина е 250 зборови. Доколку тоа ти делува прекратко, сети се дека единствените информации кои треба да ги содржи твоето писмо се: работата за која аплицираш, причината зошто мислиш дека си соодветен за позицијата и како планираш да бидеш добар работник.

Проблем бр. 2: Твоето писмо е премногу формално

blog 11 slika 3

Тоа што звучиш како Шекспир нема да ти помогне во новата работа како веб-програмер. Денес, повеќе од било кога, работодавците внимаваат луѓето кои ги вработуваат да бидат пријателски настроени, пријатни и одлични за работа во тим. Се разбира, внимавај да бидеш културен и да се изразуваш соодветно, но нема потреба од зборови кои никогаш досега во животот не си ги употребил.

Добар начин да провериш дали твоето писмо звучи неприродно и премногу официјално е да го прочиташ на глас, така ќе забележиш дали некои зборови и изрази звучат чудно кога ги изговараш.

Проблем бр. 3: Не се „продаваш” себеси доволно

Да, да се биде искрен и скромен е секогаш добро, но кога треба да се опишеш себеси и своите амбиции во 250 зборови, нема многу простор за балансирање на добрите и лошите карактеристики. Прикажи се себеси на најпозитивен можен начин, не со лажење и преувеличување, туку со акцентирање на твоите силни страни. Доколку твоето писмо содржи реченици од типот на „Знам дека најверојатно не сум најискусниот кандидат…” – исфрли ги.

Доколку навистина не се чувствуваш доволно искусно за работата за која аплицираш, биди храбар и нагласи ги твоите атрибути кои, иако недоволно искусен, те прават тебе вистинскиот избор.

Проблем бр. 4: Твоето писмо звучи себично

blog 11 slika 4

Другата крајност пак е кога забораваш дека твоето мотивациско писмо не е само за тебе. Со други зборови – избегни да пишуваш за тоа како работењето во компанијата ќе и помогне многу на твојата кариера и резиме. Менаџерите веќе го знаат тоа, тоа што не го знаат е како ти ќе и помогнеш на нивната компанија.

Прашај се себеси – кои минати искуства и знаења кои ги поседувам би и биле од прилог на оваа компанија? Дали имам било какви идеи кои можат да им помогнат?

Проблем бр. 5: Твоето писмо е преполно со небитни информации

Дали во твоето писмо одвои цел параграф за ERASMUS програмата во која учествуваше и од која научи толку многу? Доколку да, тогаш најверојатно треба да го избришеш. Дали вметна реченици од типот на „Јас сум вредна и лојална личност”? Никогаш не прави листа на нафрлани, позитивни зборови за себе, не звучи убедливо.

За да избегнеш вметување на информации кои се небитни за работодавецот и новата кариера која сакаш да ја започнеш, во твоето писмо вметни ги само вештините и карактеристиките кои се важни за позицијата за која аплицираш. Наместо да зборуваш за твојот семестар во Италија, напомени дека течно зборуваш италијански.

Овој текст е објавен во категоријата Кариера и ги содржи следните клучни зборови: кариера, вработување, најди работа, kariera, vrabotuvanje, najdi rabota, работа, како да направиш CV, интервју, мотивациско писмо.